A Fundación asina un novo Convenio coa Consellería de Cultura para mellorar a súa presenza na Rede de Bibliotecas

A Fundación asina un novo Convenio coa Consellería de Cultura para mellorar a súa presenza na Rede de BibliotecasA Fundación Luís Tilve ven de asinar un novo convenio coa Consellería de Cultura, Educación e Universidade co que se renova a súa integración na Rede de Bibliotecas de Galicia, que xa se formalizara no 2009.

Con este novo convenio asegúrase o acceso ós recursos compartidos da Rede de Bibliotecas a través dun novo Sistema Integrado de Xestión Bibliotecaria, que permitirá a interconectividade técnica e semántica, cun software acorde ós estándares necesarios para o intercambio e acceso á información por parte da cidadanía, mellorando a consulta da nosa colección bibliográfica, considerada pola Consellería “única, tanto pola súa especialización como pola súa calidade”, xa que conserva numerosas publicacións e xornais procedentes da clandestinidade e do ámbito sindical e político difíciles de atopar en moitas bibliotecas. Deste xeito a Fundación poderá acrecentar a súa colaboración na recuperación, conservación e dispoñibilidade pública do seu patrimonio bibliográfico galego, así como da documentación de interese histórico para Galicia, garantindo a súa conservación e difusión. A Consellería comprométese tamén a prestar apoio técnico para acadar servizos bibliotecarios de calidade e a promover accións formativas destinadas á profesionalización e especialización dos nosos técnicos.