Presentación: “A depuración do maxisterio nacional na provincia de A Coruña (1936-1945)”

O historiador Jesús M. García relatará este martes 8 de outubro en Santiago, a depuración que sufriron 1967 mestres na provincia de A Coruña durante a Guerra Civil e a posterior ditadura franquista.


O acto terá lugar na libraría Couceiro (Praza de Cervantes, 6), a partir das 19:30 horas, e contará tamén coa intervención do Secretario da Fundación, Roxelio Pérez Poza.


A obra é unha exhaustiva e meticulosa investigación de máis de dous anos na que se consultaron arquivos de toda España e que deron como froito o traballo máis completo sobre o proceso depurador da ensinanza en Galicia. O libro contén ademais numerosas anécdotas e historias reais de mestres que sufriron as consecuencias da loucura colectiva que supuxo a persecución e limpeza ideolóxica dun colectivo cuxo único delito foi o seu compromiso coa transformación dun país a través da renovación pedagóxica e a educación. Un traballo de varios anos que xerou unha base de datos con 200.000 entradas, o que permitiu facer un estudo completo a través, entre outras fontes, de 2.000 expedientes de mestres da provincia de A Coruña, conservados no Arquivo Xeral da Administración, en Alcalá de Henares.